હવે મન ઝૂમો માધવ ના સંગમાં
વા'લો રમે રોમે રોમે અંગે અંગ માં
 
સૂતી'તી હું તો, એ આશ છોડી કે 
વા'લો દર્શન દેશે આ જીવનમાં
થઈ પધરામણી હૈયે એની કે
હું તો નાચી ઊઠી આનંદમાં
                   ૦ હવે મન ઝૂમો માધવ ના સંગમાં
 
અધર રસ પીધો એના નામ જપન માં
ને ઉન્મત્ત થઈ એના મદમાં
લહેરાતી ચાલે ચાલું હવે કે 
મેં તો લાજ મૂકી એ ચરણમાં
                  ૦ હવે મન ઝૂમો માધવ ના સંગમાં
 
એકજ મિલનમાં રોમેરોમ વસીયો
વા'લે રાસ રચ્યાં મધુવનમાં
રોજે રોજ રમું ને રોજે રોજ માણું
હું તો રંગાઈ એના રંગમાં
                 ૦ હવે મન ઝૂમો માધવ ના સંગમાં
 
મે'ર કરી  ને વા'લે સાચું સૂખ દીધું
થઈ શરણાગત એ ચરણમાં
ભૂલાયું જગ ને ભૂલાઈ જાત
હું તો થઈ રમઝોળ હરિ અંગમાં
                ૦ હવે મન ઝૂમો માધવ ના સંગમાં